عايشة باغنى

[إيمان معاذ]

عايشة باغنى
*************
وبتسالنى ..
وبتسألنى إزاى أنا عايشه ؟؟
فاكر جرحك ليَّه قتلنى !!
فاكر سهم الكلمة الطايشة
صاب القلب وصاب النِنى ؟؟
أنا مش لسه ضعيفة وهشة
ولا يحيينى قُربك منى
أنا ببساطة عايشة لأنى ..
لسه باغنى
***
لسه بشاغل صمت الكون
قادره أجدد روحى ودمى
وابقى مشاعل .. وابقى عيون
وابقى مرايا لعالم رافض ..
أبقى مرايته
وابقى الرايا للى انداست ..
راسه ورايته
وابقى الملح لأمسخ لُقمة ..
الشعب أكلها
كلمة حق ..
فلتت من .. طوقها وموالها
صبحت دانة
***
مش ندمانة .. لأني هويتك
ولا سهرانه بأنب روحى ..
ازاى حبيتك ؟؟
قبل ماتنسى الحب .. نسيتك
قبل ماتبعد يوم .. حسيتك
عشت فتورك
خدت قرارى .. قطعت جسورك
بس غرورك يوم صور لك
أنى هاعيش العُمر فى ضِلك
وانى هاموت لو هارفض ذُللك
وان كنوز الدنيا ماتسوى ..
لحظة قربك
أحضن كدبك .. اسكُن وهمك
وابعد عنى
ووعاك ترجع يوم تسألنى ..
ازاى أنا عايشه ؟؟
أنا فى وجودك ..
كنت حقيقى ضعيفة وهشه
كان مفروض انك تسألنى
ازاى عايشه ؟؟
***
لكن بَعدك
حتى إن مُت .. هيفضل فنى
وأفضل عايشه برحى لأنى
رغم هموم وغيوم العالم
كنت بأغنى
ولسه بأغنى
***

[حمزة صبحي حمزة]

ناري في إيديا وإديا تنزل معاكوا على راس الحية وتموت شريعة هولاكو
طوبى لك فيما كتبت
اقرأ هنا الشاعر أحمد فؤاد نجم وأردد كلماتك كما الشيخ إمام
دمت لفلسطين

[زهراء المقدسية]

أعجبتني عزتك أيتها الأنثى

ولمثلك كل الاحترام والتقدير

مودتي

[سماح عبد الغني]

هنيئا لقلب لم ينكسر رغم الهزيمه

تسلم إيدك

[إيمان معاذ]

الأخ الفاضل حمزة .. أسعدنى مرورك الجميل على قصيدتى .. وشرفنى تشبيهك لى بلون الشاعر الكبير أحمد فؤاد نجم .. وإن كنت دائما أنتمى لمدرسة الراحل صلاح جاهين رحمه الله .. اشكرك سيدى جزيل الشكر .

[إيمان معاذ]

زهراء الجميلة .. أسعدنى مرورك وأكثر ما أسعدنى رأيك الذى أعشقه فى عِزة المرأة فأنا ضد الخنوع والضعف .. ولا يوجد ما هو أهم وأرقى من كرامة المرأة .. وليس فى الحياة من ليس له بديل ..
مرة أخرى أشكرك حبيبتى

[إيمان معاذ]

سماح الجميلة .. أشكرك وأسعدنى مرورك .. أتمنى دائما أن تنال قصائدى إعجاب أصدقائى ..
دمت لى حبيبتى